Announcement

Collapse
No announcement yet.

tum qatl karo ho yaa karaamaat karo ho...ek Hyderabadi Urdu meN Ghazal

Collapse
X
 
  • Filter
  • Time
  • Show
Clear All
new posts

    tum qatl karo ho yaa karaamaat karo ho...ek Hyderabadi Urdu meN Ghazal

    salaam dosto,
    ummeed hai k mizaaj-e-giraamii baKhair hoNge.

    mundarja baalaa Ghazal moHtaram janaab Dr. Kaleem "Aajiz" kii hai. is Ghazal kaa ek taareeKhii pas manzar bhii hai jo nihaayat aham hai. 1975 meN jab Indira Gandhi ne mulk meN Haalat-e-hangaam [emergency] naafiz kii to har qism kii ziyaadtiyaaN vujood meN aane lagiiN, insaanii Huqooq kii paamaalii huii. usii saal yaum e aazaadii ke din laal qil'a par ek mushaa'ira huaa jis meN Indira Gandhi bhii meHmaan e Khusoosii thiiN...Kaleem saaHab marHoom kii jab baarii aayii to unhoN ne Indira Gandhii kii taraf ishaarah kar ke yeh Ghazal paRhii...India Gandhii ne bahot ta'reef kii aur qat'an buraa nahiiN manaayaa...yeh shaayad ek achchhe siyaasat daaN kaa zarf hotaa hai k vo sab kuchh bardaasht kar jaaye.

    to, Ghazal mulaaHizah farmaaiye.

    faqa6t Khaak_nashiiN,
    _______KKF


    mere hī lahū par guzar-auqāt karo ho
    mujh se hī amīro kī tarah baat karo ho

    din ek sitam ek sitam raat karo ho
    vo dost ho dushman ko bhī tum maat karo ho

    ham ḳhāk-nashī tum suḳhan-ārā-e-sar-e-bām
    paas aa ke milo duur se kyā baat karo ho

    ham ko jo milā hai vo tumhī se to milā hai
    ham aur bhulā de tumhe kyā baat karo ho

    yuu to kabhī muh pher ke dekho bhī nahī ho
    jab vaqt paḌe hai to mudārāt karo ho

    dāman pe koī chhīT na ḳhanjar pe koī daaġh
    tum qatl karo ho ki karāmāt karo ho

    bakne bhī do 'ājiz' ko jo bole hai bake hai
    dīvāna hai dīvāne se kyā baat karo ho


    Life is NOT measured by the number of breaths we take but the moments that take our breath away!!!
    16 breaths a minute, 23040 a day...NO one knows which one will be their LAST!
Working...
X